Bolbe Hasie

Nos ta bibando den un momentu hopi krusial den nos bida kaminda ku bo ta mira medionan sosial tin hopi influensia riba hende, riba e desishon ku nan ta tuma, e produkto ku nan ta kumpra, kiko nan ta kome. I di un manera of otro no simplemente esei pero te asta nos tin e nesisidat pa ekspone of ekspresa nos mes aun mas miho riba medionan sosial, tin momentu ku bo ta asta mira ku un hende por tin un bida ku ta mustra manera ku e ta masha dushi mes i ora bo wak e realidat no ta nada kompara ku loke bo a mira riba medionan sosial. 

Komo kreyente/ kristianan nos ta hiba un bida mesun kos, ku nos ta bisa ku nos ta kristian of nos ta bisa nos ta kreyente pa e nomber, pero ora bo wak nos realidat e no ta mesun kos of di un manera of otro nos palabranan no ta kuadra ku nos akshon.

“ Señor, m’a tende di bo fama, bo obranan ta yena mi ku rèspèt. Bolbe hasi nan, Señor, den kurso di nos bida, laga hende di nos tempu mira nan. Maske bo tin motibu pa rabia, no lubidá di mustra nos bo mizerikordia.” 

Habakuk 3:2

E autor aki ta bisa Señor ma tende di bo fama, pero no simplemente mi a tende di Bo fama pero BO OBRANAN ku otro palabra Dios loke nan ku Bo a hasi den mi bida i den mi famia su bida, e portanan ku Bo a habri, e momentu nan ku Bo provee, e manera kon Bo a provee, loke nan ku bo a hasi awor a yena mi kurason ku rèspèt di Bo. 

Loke ku e ta ekspresa ta ku Dios lokenan ku Bo a hasi a pone mi para un ratu ketu i pa mi por mira ku Abo Dios ta merese mi rèspèt absoluto.

I e versikulo ta sigui bisa BOLBE HASI NAN, ora ku nos lesa esei e mester ta nos konvikshon ku Dios Bo a hasie un biaha kaba i Dios awe nos ta aserka Bo trono ku konfiansa ku fe ku Dios Abo lo bolbe hasi’e den nos bida, e milagernan ku Bo a hasi, e portanan ku Bo a habri, e sanashon ku bo a hasi Dios awe nos ta konfia i pidi  Bo Dios ku den e temporada ku nos ta biba aki awor nos bolbe mira e obranan ku Bo a hasi. 

Awe hasi e palabra nan aki parti di bo orashon ku bo ta pidi Dios pa E bolbe hasi nan den bo bida i no simplemente esei pero ku Dios pemiti ku otronan por rekonose Dios pa medio di bo i e manera kon abo ta representa Kristu.